Vilkår og personvern

Salsvilkår for Os Sauna

1. Avtalen

Avtalen er desse salsvilkåra, opplysningane du får i bookingløysinga, og eventuelle særskilte vilkår me har avtalt skriftleg. Ved motstrid går det som er særskilt avtalt føre, med mindre det strid mot ufråvikeleg lov. Er eitt punkt ugyldig, står resten av avtalen ved lag. Avtalen blir utfylt av dei lovreglane som gjeld kjøp mellom forbrukar og næringsdrivande, og mellom næringsdrivande.

2. Partane

Seljar er Os Turnforening, organisasjonsnummer 983 958 249, Idrettsvegen 41, 5210 Os. Foreininga eig og driv Os Sauna, som ligg på Steinneset ytst i Os hamn i Osøyro. Du når oss på info@ossauna.no. I avtalen er Os Turnforening kalla «seljar» eller «me».

Kjøpar er den personen eller verksemda som gjer bestillinga, i avtalen kalla «kjøpar» eller «du». Er du forbrukar, gjeld forbrukarvernet i norsk lov fullt ut. Er du næringsdrivande, gjeld ikkje reglane om angrerett.

3. Kva me sel

Me sel plassar i den flytande badstova på Steinneset. Badstova er vedfyrt og sjølvbetent. Det er ingen vert på staden, og du fyrer opp i omnen sjølv. Du kjem inn med ein kode på kodelåsen på døra, og du steller deg sjølv frå du bookar til du låser att.

Me har faste økter kvar dag. Morgonøkta, kl. 08.00 på kvardagar og kl. 06.00 i helga, varer tre timar, fordi badstova då er kald og treng lengre tid på å bli varm. Øktene utover dagen varer to timar. Opptenninga er rekna inn i økta.

Kvar økt kan bookast på to måtar. Ei fellesøkt er éin plass i ei økt du deler med andre gjester, og badstova har ti plassar. Ei privat økt er heile badstova til fast pris, for gruppa di åleine. Bookar nokon ei privat økt, fell fellesøkta på same tidspunkt bort, og omvendt. Prisen er ulik på kvardagar og i helga, og for privatøkter òg med tida på døgnet. Veden er med i prisen.

Privatøkter legg me ut fleire månader fram. Fellesøkter legg me ut nokre veker om gongen. I tillegg sel me klippekort, abonnement og gåvekort. Desse er omtala i punkt 8. Kva kvar økt kostar, kor lenge ho varer, og kva tider som er ledige, ser du i bookingløysinga før du betaler.

4. Pris

Prisen står i norske kroner og er den samla prisen du skal betale, med alle avgifter. Kjem det til kostnader som ikkje var oppgjevne då du bestilte, skal me avklare dei skriftleg med deg før dei blir belasta.

Veden er med i prisen på økta. Andre tilleggsval du får tilbod om ved utsjekk, er frivillige, og du vel sjølv om du vil ha dei.

5. Bestilling og betaling

Bookinga og betalinga skjer i bookingløysinga hos Periode. Du betaler ved bestilling, og avtalen er bindande frå me har motteke bestillinga di. Rett etter betalinga får du ei stadfesting og koden til låsen på e-post.

Avtalen er likevel ikkje bindande dersom det er ein skrive- eller tastefeil i tilbodet eller i bestillinga, og den andre parten skjøna eller måtte ha skjøna at det låg føre ein slik feil.

6. Aldersgrense

Du må vere fylt 16 år for å booke og for å bruke badstova åleine. Er du under 16 år, må du vere i følgje med ein person over 18 år, som svarar for økta. Oppdagar me at ein mindreårig har booka utan ein slik vaksen, kan me avlyse bestillinga.

7. Tilgang til badstova

Koden gjeld berre for den booka økta di. Du har sjølv ansvar for å sjekke at du har fått koden etter at du betalte. Får du han ikkje, ser du fyrst i søppelposten og seier så frå til oss med ein gong. Me er ikkje bundne til å gje ein kode etter at økta har starta.

Badstova er sjølvfyrt. Ho kan vere kald når du kjem, og det er du som fyrer henne opp. Veden ligg klar i kista i garderoben. Rydding etter bruk høyrer med, sjå bruksreglane.

Badstova har omkledningsrom, men ingen dusj. Nedkjølinga er sjøen, frå badestigen på dekket.

8. Avbestilling og angrerett

Økter

Ei booka økt er ei fritidsteneste med fastsett dato og tid. For slike tenester er det inga angrerett, jf. angrerettlova § 22 bokstav m. Bestillinga er bindande frå du har betalt, og gjev ikkje rett til refusjon. Me kan vise kulanse i einskildtilfelle, men det gjev deg ingen rett til det.

Du kan flytte økta di til ei anna ledig tid fram til 24 timar før økta byrjar. Nærare økta får du ikkje flytta bookinga.

Klippekort

Eit klipp gjev rett til å booke éin plass i éi økt. Klippa gjeld i to år frå kjøpsdagen. Som forbrukar har du 14 dagars angrerett på sjølve klippekortet så lenge ingen klipp er brukte. Har du brukt eitt eller fleire klipp, fell angreretten bort for heile kortet. Klipp du ikkje har rukke å bruke innan to år, blir ikkje refunderte.

Abonnement

Eit abonnement er ein løpande avtale som gjev deg eit fast tal økter kvar månad. Du kan bruke øktene på andre enn deg sjølv, men kvar ekstra person i ei booking tel som ei økt.

Som forbrukar har du 14 dagars angrerett på sjølve abonnementet frå du inngjekk det. Du kan seie opp abonnementet når som helst i bookingløysinga. Oppseiinga gjeld frå neste betalingsperiode, og me refunderer ikkje for den perioden som alt er betalt, eller for økter du ikkje har brukt. Endrar me pris eller vilkår, varslar me deg minst 30 dagar før, og endringa gjeld ikkje bakover i tid.

Gåvekort

Kjøper du eit gåvekort, har du som forbrukar 14 dagars angrerett frå kjøpet så lenge gåvekortet ikkje er brukt. Gåvekortet er gyldig i tre år frå kjøpet, i tråd med den ordinære foreldingsfristen i foreldingslova, og kan ikkje løysast inn i kontantar. Når gåvekortet er brukt til å booke ei økt, gjeld reglane for økter ovanfor.

9. Andre varer

For varer du får tilsende, har du som forbrukar 14 dagars angrerett frå du fekk vara. Du dekkjer returkostnaden, med mindre me har avtalt noko anna. Me betaler tilbake innan 14 dagar frå me fekk melding om at du angrar, men kan halde att pengane til vara er komen tilbake eller du har dokumentert at ho er send.

10. Om badstova ikkje er tilgjengeleg

Badstova ligg eksponert ytst i hamna. Uvêr, høg sjø, skade på fortøying eller teknisk svikt kan gjere at me må stengje på kort varsel. Må me avlyse økta di, får du pengane tilbake eller ei ny tid, alt etter kva du vil. Me dekkjer ikkje følgjekostnader, som reise eller tapt tid. Me avlyser aldri ei booka økt berre for å leige ut til ein annan.

Held ikkje badstova den standarden me har avtalt, eller er ho ikkje tilgjengeleg til den booka tida av grunnar som ligg hos oss, kan du krevje ei ny tid eller eit forholdsmessig prisavslag. Du må seie frå til oss innan rimeleg tid etter at du oppdaga eller burde ha oppdaga forholdet.

11. Om du ikkje held din del

Betaler du ikkje, kan me krevje forseinkingsrente etter forseinkingsrentelova og gebyr etter inkassolova, etter varsel.

Bruker du badstova i strid med bruksreglane, kan alvorlege eller gjentekne brot føre til at me hevar avtalen, viser deg bort eller stengjer deg ute, og krev erstatning. Å sleppe inn folk som ikkje har betalt, reknar me som eit alvorleg brot.

Skade du eller gjestene dine gjer på badstova, omnen eller utstyret, svarar du for. Går de over det talet plassar du har booka, eller slepper de inn fleire enn den private økta er avtalt for, kan me krevje erstatning.

12. Tryggleik og ansvar

Me syter for at badstova, omnen og fortøyinga er teknisk forsvarlege og haldne ved like, og at bruksrettleiinga på staden er oppdatert.

Helse

Du og gjestene dine bruker badstova på eige ansvar for eiga helse. Høg varme og kaldt sjøvatn er ei påkjenning, og for nokre kan det vere farleg, til dømes ved hjarte- og karsjukdom, høgt blodtrykk eller graviditet. Vurder sjølv om du og gjestene bør bada, og bada forsvarleg.

Eld

Badstova har vedomn, og du fyrer opp sjølv. Bruk berre ved, og følg rettleiinga som heng i badstova. Legg ikkje ved oppå omnen, tørk ikkje klede på han, og lat aldri omnen stå med open luke. Hell berre reint, ferskt vatn på steinane.

Sjø

Badstova flyt, og sjøen ligg rett utanfor døra. Du har ansvar for at de badar trygt frå stigen og dekket, held tilsyn med barn, og ikkje bruker badstova eller badar under påverknad av rus.

Ingenting i desse vilkåra avgrensar ansvar me etter ufråvikeleg lov ikkje kan seie frå oss, mellom anna ansvar for personskade som følgje av aktløyse frå oss.

13. Personopplysningar

Me behandlar personopplysningane dine slik det står i personvernerklæringa vår. Os Turnforening er behandlingsansvarleg.

14. Klage og tvisteløysing

Har du ei klage, seier du frå til oss på info@ossauna.no innan rimeleg tid, så prøver me å finne ei løysing. Kjem me ikkje til semje, kan du bringe saka inn for Forbrukartilsynet for mekling. Forbrukartilsynet når du på telefon 23 40 06 00 eller på forbrukartilsynet.no. Tvistar elles blir avgjorde etter norsk rett.